وقال "فلوكس" خلال لقائه ببرنامج "شيخ الحارة" على قناة "القاهرة والناس"، مع إيناس الدغيدي: "مكنتش عاوز أطلق هنا شيحة لأنها جميلة جدًا ومن الناس اللي قابلتهم وما يتعوضوش.. كانت بتحبني جدًا وست بمليون راجل ولكن أنا كرجل صعب.. صعيدي حتى لو ماروحتش الصعيد طول عمري.. وعصبي جدا وفي نفس الوقت هنا ما يتفرطش فيها بسهولة بس هي اللى طلبت، وطبيعي اللى هتطلبه هنا هعملهولها لغاية ما أموت".
وعن كيفية دخوله الفن، أضاف فلوكس: "ما دخلتش الفن عن طريق والدي، بالعكس هو كان رافض.. أنا دارس إعلام قسم تصوير.. وأبويا كان عاوزنى أشتغل في البيزنس.. وبالفعل أنا دلوقتى فاتح شركة.. لأن الفن ما بقاش هو اللي تربينا عليه.. وأكبر دليل على كلامى، إني كنت بروح الجامعة بميكروباص.. يعنى تعبت في البداية".
وعن حقيقة خلافه مع النجم محمد رمضان، وما إذا كان الأخير يستبعده من أعماله الفنية، قال أحمد فلوكس: "أنا اللي ما بشتغلش مع أي حد، بنقي اللي بشتغل معاهم.. ما حدش يجبرني أشتغل مع حد.. بعد عادل إمام ومحمود عبد العزيز ما بتكلمش على نجوم.. محمد رمضان صاحبي واشتغلنا في أكتر من مسلسل.. وعمري ما اتغريت على حد.. التمثيل شغلانة الأنا.. وهو ده اللي اتعلمته من أبويا، وقبل كده شاركت كممثل كومبارس في أغنية الدنيا مجنونة وخدت 50 جنيه".
وبسؤاله من هو نجم مصر حاليًا، قال فلوكس: "أحمد السقا مدرسة كلنا جرينا وراها.. أما أحمد عز لما اشتغلت معه في الممر لقيته بيشتغل على نفسه بشكل مش طبيعي وبيحترم كل الناس.. أما أمير كرارة، تعب جدًا في حياته وأخد السلم من تحت.. وأعرفه من أيام الجامعة".
